🚨ជុំវិញការវាយប្រហារបណ្តាក់គ្នា ជាង៥០លើក ក្នុងរយៈពេល២យប់ជាប់គ្នា នៅភាគខាងត្បូងប្រទេសថៃ រដ្ឋមន្ត្រីការបរទេស Sihasak Phuangketkeow និយាយថា

ដោយ គោព្រៃ ចេញផ្សាយ ថ្ងៃទី 24 ខែ សីហា ឆ្នាំ 2026

ជុំវិញការវាយប្រហារបណ្តាក់គ្នា ជាង៥០លើក ក្នុងរយៈពេល២យប់ជាប់គ្នា នៅភាគខាងត្បូងប្រទេសថៃ រដ្ឋមន្ត្រីការបរទេស Sihasak Phuangketkeow និយាយថា តាមពិតយើងដឹងមុនអំពីអំពើហិង្សានេះ គ្រាន់តែមិនច្បាស់ថា តើវាកើតឡើងនៅពេលណាឲ្យប្រាកដ។

នាព្រឹកថ្ងៃចន្ទ ទី២៤ ខែសីហា ឆ្នាំ២០២៦ នៅឯវិមានរដ្ឋាភិបាលក្នុងទីក្រុងបាងកក លោក Sihasak ត្រូវបានអ្នកកាសែតសួរថា ហេតុអ្វីបានជាហេតុការណ៍ជាង ៥០ករណី អាចកើតឡើងបាន បើទោះជាមានព័ត៌មានការណ៍សម្ងាត់ ជាមុនហើយក៏ដោយនោះ? រដ្ឋមន្ត្រីរូបនេះឆ្លើយថា ពិតណាស់ ភ្នាក់ងារចារកម្ម ដឹងពីផែនការទាំងអស់នេះ ប៉ុន្តែវាពិបាកខ្លាំងណាស់ ក្នុងការសន្មត់ឲ្យច្បាស់ថា តើពួកគេនឹងធ្វើសកម្មភាពនៅពេលណា និងមានទ្រង់ទ្រាយធំកម្រិតណា?

តាមសម្តីលោក Sihasak ដែលដកស្រង់ផ្សាយដោយ Khaosod, មិនងាយឡើយដែលអាចទាយទុកជាមុនបានអំពីការវាយប្រហារបែបនេះ ព្រោះប្រតិបត្តិការបែបនេះ ត្រូវគេពង្រាយនៅតាមទីតាំងផ្សេងៗគ្នា។

ស្របពេលជាមួយគ្នានោះដែរ លោក Sihasak បញ្ជាក់ថា បណ្តាភ្នាក់ងារសន្តិសុខថៃ នឹងត្រូវវាយតម្លៃ និងពិនិត្យវិធានការសន្តិសុខឡើងវិញ ក្រោយការវាយប្រហារនោះ៕

ប្រភព៖ Khaosod